नोनी

मन म सब कचरा माढ़े
पहिरे हे कुरता खादी
जनता के राज म भईया
मोर जर गे परवा छांदी


तोर टिपिर-टिपिर भाषन ह
बनगे मिरगा के धोखा
मोर छत्तीसगढ़ ह रहिगे
खाली माचिस के खोखा
तोर करम के खातिर बंधवा
मोर करम म परगे सांधी





मोर छोकरी के देंह दिखथे
जईसे बिन खपरा छांदी
पखना कस छाती धरके
मैं काकर खांवां मांदी?
मोर लइका भूखन रहिगे
तोर राम राज म गांधी

बरगे-बरगे मोर कुरिया
जरगे-जरगे मोर लइका
थहिगे, रहिगे मोर पीरा
आंखी म कटगे रथिया
मोर नोनी जरके मरगे
तोर राम राज म गांधी

रमाकांत सिंह 11/04/1978
बचेली, बस्तर छत्तीसगढ़ के
अग्निकांड में मृत लोगों को समर्पित
चित्र गूगल से साभार