***** आँकस *****

नई लेवय छुआ छूत न लेवय लबारी

आन तान करे आउ होगे मरे बिहान 

बड़ आँकस आय देबी देंवता कस छां बेटी के घलऊ ....

ए मन के हिरदे हर नरियर आय, एक तो बड़ ऊंच म फरथे

फेर बड़ दिन म पाक थे, पाकगे त टोरे आउ टूटे म दिक्कत

अपन मन के झरथे त गुरतुर अतका कन के गुर के सेवाद ले जादा आउ मुं म गईस त अपन मन के घूरगे ।।

माता दाई गां के रच्छा करईया देबी ..कभू नई जावय नोनी पिला मन ..असुधहा रथे त। बने त बने बिगड़ गे त पुरगे 

94 गाँ के मलकियत आउ पागा बंधाये हवय  हमर तलवार भंजवईया ठाकुर साहेब मन के कपार म ।।

ऊंच पुर देंह काठी के जवान अपन  लाव लस्कर संग आये रहिन के  ??? बलाय गे रहिन २५० बछर पहिली , सुनती सुने हवन ददा बबा मन करा । जुन्ना मालिक मन नई सकेले सकीन राज ...बदलत गे .......धीरे धीरे छिनागे...

मालगुजारी आगे हमर करा......

रेंगथे सुरुज संग महतारी के कोंख घलऊ ह .....

ओकरो ले ऊपर बेटा होगे त बंस चलाये बर बने कुल खूंट के बेटी खोज आउ आउ ला अपन भोजहर के देबी कस

बेटी होइस त खोज अपने कस के अपने बेटा कस पोठ छाती के जे ह ओकर दुख सुख ल झेले सकय जिनगी के घाम छां म आउ रेंगय सासत म घला मुसकियात .....

तिलोकचंदी परिवार सुने हन राजा हर्षवर्धन गोतीयार आय

ई हु मन आये रहीन गौटिया मन के सेतिर लड़े बर

रुक गे छत्तीसगढ़ के माटी के मंहक म .....

महानदी, पैरी, सोंढुल, शिवनाथ, इंद्रावती, नर्मदा, अरपा, सबरी, रेनुका, हसदो, मांड़, गनियारी, लीलागर नदिया मन के सुग्घर बोहात पानी धर लिस लईका कस अंचरा ल

फेर काय होगें खुटिहर ई माटी के .....

बर, बिहाव, छट्ठी, छेवारी, मरनी,  हरनी, हमन के छोंड़ किस्सा संग म आय तेली, नाउ बनिया सबके इं कस होगे

लग गे हवा पानी इहाँ के होगे गुर लाटा ...

अब खोज देख कोंहुँ जात म कोंहुँ जात के गुन

मिंझर गये है गोरस आउ गंगा कस जल एक दूसर म

ए दे कहाँ राजिम  ले बोहात बोहात ए दे पहुच गयें शिवरीनारायण के खंड म ....सुरता आईस ....

बहरतीन दीदी के .....१४ भाई बहिनी म छोटकी नोनी 

लटपट बाँहचीस त धरागे नां बहरतीन एक भाई भान सिंह लट सट ओहुँ नांदिस बारा खटकरम करे म ....

बहरतीन नोनी के जस जस उमर बाढ़त गे तस तस ओखर 

माथा के  अंजोर लकलकाय बर धरिस संसो पेले बर धर लिस दाई ददा ल । व्यास महाराज बनाये रहीन ओखर 

जनम दिन के लिखा पढ़ा के कागज पाथर ल

पुरोहित व्यास जी के नता गोता आय ढाबा दत्त महाराज 

दुनो पुरोहित मने मन म गुनिन फेर सोर सुना दिन 

चंदेल परिवार म मालिक मकुंदी सिंह जी के पुरखा ल धरागे लगन पांत आउ बाजा गाजा संग पधारीन मुलमुला गाँ द्वार चार, लाली भाजी खवाई , बारात पघराई संग परिस भाँवर होगे बारात बिदा ....

गमक गे ..... ( कुलपत सिंग ) बइहा गौंटिया के अँगना ...

हमर ममा दाई तिरजुगी दाई बतावय के बहरतीन दीदी गरूआ ल पेज पानी ढ़रवाय जावय त गाय के कान ठाढ़ हो जावय, कमियां, कमईलिन , राउत, नाउ, घर के आये गये मनषे अब बिन संकरी खटखटाये नई खुसरय घर ।

ममा दाई के ननद जानकी दीदी घलो ई गांव के बहुरिया बनके आय रहिस ।

फेर दिन जात बेरा नई लागय समय के पंछी उड़ाके चार बरिस आगू आगे... फेर घर म छट्ठी छेवारी के सोरी डोरी नई मिलिस, अब थोकन घर गरूआगे मनषे मन के कहा सुनी सुरु होगे , बलाईंन ढाबा दत्त महाराज व्यास जी ल देखिन जन्म पतरी ल कोई कलदप नई मिलिस ।

दु बेटी एक बेटा के जोग पट पट ले दिखिस ।

जतका मुं ओतके बात सुन गुनहा सुनाए बर धरिस

मकुंदी मालिक दूसर बिहाव करहिं काय ???

सारे लबारी बगरगे कई कोस ले

लपरहा नाउ सम्मत नान जात उनीस न गुनिस 

मिसिर महाराज संग बिन सोर देहे पाये अजार कस ह

हबरगे कुपेचहा बेरा म ....ओकरो ले ओ पार बिन आरो करे दंगरस दंगरस पेल दिस अँगना म ...…

जतका म गौंटिन दाई गोड़ धोये बर पानी देतिस ततका म

सारे रम्मत नाउ उछर डारिस अपन घर आये के सोर....

जगम ले बरगे बहरतीन के देंह , आई छीन आगे , एक घरी म सनसनागे माथा फेर धीरज धरके दीदी रेगिस कोला के फईका  ओधाय बेंड़ी  चढ़ा दिस त ओहि रेंगना आ गे फेर अंगना म अब धीरे से चढ़गे संकरी भीतरी अँगना के आउ जम जम ले चढ़गे बेंड़ी.....

अब बहरतीन गौंटिन पूछींन मिसिर महाराज के आये के कारन ....जतका म महाराज कुछु मुं फरकातीन लपरहा रम्मत गोठ ल अध्धर ले झोंक के फेर नून मिरचा लगाके

एके सांस म बफल दिस सब्बो बात

गोठ के निकलती होइस आउ बहरतीन गौंटिन के सात फुटिया तेंदू के लऊड़ी चल गे रम्मत के मुंड़ म

थोकन चूकगे दीदी के लाठी के अंदाज़ ह नहीं त ओहि म रम्मत के मुड़ी शिवरीनारायण कस कलिंदर बगर जातिस अँगना म..... रम्मत हाग मूत डारिस "आँकस देबी ,, के 

आँखि ल देख के .......मिसिर महाराज हक्का बक्का ...

कहाँ ले बल पुरिस कोन देबि देंवता ल सुमिरिस होही रम्मत ओकर भगवान जानय एके कुलांचा म आठ फुट के खवा ल कूद डारिस , पल्ला होंगे पागी ल धरके कोला,  बारी, नरवा, झोरकी कूदत फांदत पहुंच गे खाल्हे राज

नई आईस जनम भर कोसा गाँ चेता दिस सात पीढ़ी ल झन जाहा बिन जाने समझे कोकरो घर.....

बड़ *** आँकस *** आय मुलमुलहिन गौंटिन मन 

बछर बीतगे जुन्ना घर टूट गे फेर जइसे अँगना म गोड़ मढ़ाएं मोला लागिस... बहरतींन दीदी रपोट लिस आउ कहिसआ गये रे बाबू रमाकांत.... तोर संगे संग तोर देंह म भेंट होगे ....तोर बाबू बहोरन संग मोर भाई भान सिंह 

" आँकस ,, आय महतारी के कोंख जे ह जनम देथे

माघ शुक्ल पाख दशमी दिन सोमवार

19 फरवरी 2024