" अगास दिया ,,

चूल्हा के आगी आय मोर महतारी 

कभू-कभू लागथे भौरी मारत पानी के लहरा आय दाई

फेर कोहुँ दिन ओकर छाती ह भुंइया कस पसर जावय

ददा बताइस तोर महतारी पवन आय बगर जाथे सब जगा

दीदी कहिस हमर महतारी अगास आय

दाई लइकई म चित्त सुत जावय आउ गोड़ म फ़ांस लय गोड़

ऐढ़ा-बेढ़ा फंसगे हमर गोड़, आउ अध्धर होगे चुतर

डेरी हाथ जेवनी म आउ जेवनी हाथ डेरी म धरागे

फेर कभू-कभू माताराम बईठ जाय खटिया के पाटी म

आउ फ़ांस देवय दुनों अपन गोड़ के आजू-बाजू

एहु म फेर हेल्ला  पर जाय हमर दुनों के चुतर

हवा खुल जावय पेट हरू हो जावय, गोड़ के गुझियांये 

सकलाय जतका नस रहय ते मन पट पट ले माढ़ जाय

ई खेल आउ खेलवारी म रहीस हमर बैज्ञानिकता

ओइ गीत मोर महतारी के आजो घलो किंदरत हे मन म

***** झुलिया झूल कदम के फूल

बाहरत-बाहरत कौड़ी पायेन ।।

          एहि कौड़ी के नुने बिसाएंन

ओहि  नुने ल गईया खवाएंन ।।

           इहि गईया ल गयेन चरायेंन

ओहि गईंया ल गयेन धनायेंन ।।

            इहि गईया के दुधे दुहायेंन

ओहि दूध के खीर पकायेंन ।।

           आ जा राजा मुहूं ल खोल

ए दे खीर  गुप्पूक ले ।।

माताराम गुड़ेरिया चिरई कस फुर्र ले उड़ियागे

सोचत हावव अगास म कोन मेर होही

अगास म देखथौं चोर आउ खटिया (सप्तर्षि) के दुरिहा म

***अगास दिया *** बन रब्बक ले चमकत मोर महतारी 

गीत सुनावत हे मोर बहिनी सुनीता ल

***अटकन बटकन दही चटाकन

लऊहा लाटा बनके कांटा

    तुहूर तुहूर पानी आवय

सावन म करेला फुटय

     चारों ( पांचों ) बेटी गंगा गईँन

गंगा ले गोदावरी

     पक्का पक्का आमा खाईन

आमा के डारा टूटगे

        भरे कटोरा फुटगे

काबर भरे कटोरा फुटगे ?

कईसे भरे कटोरा फुटगे ??

आश्विन कृष्णपक्ष तृतीया, पितृ पक्ष

12 सितम्बर 2022